今晚，英超快車壓軸尾場將上演萬眾矚目嘅「雙紅會」，阿仙奴主場對陣曼聯，兩大勁旅誓要全力爭勝。阿仙奴近期狀態火熱，隊長馬田奧迪加特復出後，球隊已取得3連勝，士氣爆棚。而曼聯喺新帥魯賓艾摩廉上任後，前鋒群成功激活，加上多名後防主力缺陣，預料今場比賽將會鬥攻到底，更令球迷期待入球如雨嘅激戰場面！（Now 621及611台，周四凌晨4時15分直播）
阿仙奴火力全開，馬田奧迪加特成核心關鍵
阿仙奴此前曾因核心中場馬田奧迪加特受傷而陷入短暫低潮，但隨住呢位具頂尖創造力嘅隊長傷愈復出，球隊迅速重返正軌。奧迪加特復出後，阿仙奴已連贏3場，並喺不同賽事入13球之多，平均每場驚人嘅4.3球，足見其攻擊火力有幾驚人。其中，奧迪加特同布卡約沙卡喺右路嘅配合更係撕破密集防線嘅絕佳武器，而沙卡今季表現同樣光芒四射，目前已喺聯賽攻入5球並送出10次助攻，更成為今季歐洲5大聯賽首位達成雙位數助攻嘅球員，實力不容忽視。
更加令人絕望嘅係，阿仙奴嘅進攻點多到令對手防不勝防。好似上輪球隊用5比2大勝韋斯咸，係由5位唔同球員入波，包括前鋒、中場甚至後防位置都有。呢種多點開花嘅進攻模式，令兵工廠過去3場比賽全數開出3球或以上，無論實力抑或士氣，呢支球隊已經準備好喺主場迎擊曼聯嘅挑戰。
曼聯新帥上任，激活攻擊群
曼聯自新帥魯賓艾摩廉執教後，球隊可謂漸入佳境，近3場比賽取得2勝1和佳績，近2場更是全勝並攻入7球，展現咗由攻擊手帶動嘅強大火力。艾摩廉主打343或者3421陣式，令多位球員嘅位置重新調整，尤其新晉球員阿密特迪亞路喺右翼衛嘅表現令人眼前一亮。同時，進攻三叉戟拉舒福特、海倫及約舒亞舒克斯喺佢嘅調教下紛紛搵番狀態。其中，拉舒福特近3場已經射入3球，作為「兵工廠剋星」，佢過去4次聯賽對陣阿仙奴更有4球進帳，可見佢喺大戰中往往能夠踢出關鍵作用。
即使拉舒福特表現稍有失準，曼聯亦能倚賴海倫及約舒亞舒克斯喺後備席候命，隨時為球隊帶來關鍵入球。有咁多進攻選擇，紅魔確實擁有充足火力應對兵工廠嘅挑戰。
防線漏洞，或以攻代守
然而，曼聯並非全無隱憂。中堅利辛度馬天尼斯及防守中場明奈因累積黃牌停賽，令曼聯嘅防守能力備受考驗。缺乏穩定嘅防守屏障下，艾摩廉或考慮以進攻代替防守，利用進攻火力壓制對手。值得留意嘅係，曼聯過去4場比賽有3場都開出3球或以上，展現出「鬥攻」風格。
此外，雙方過去對碰往往踢出高入球大戰，隨住兩隊近況皆進攻不斷升溫，今場再度出現大比分嘅可能性極高。球迷絕對值得留意呢場久違嘅雙紅會！
